KOTA KINABALU: Polinta Sabah mokianu projik kapanadaan Lebuhraya Pan Borneo popoompit nopo kalaja papahaab talun-alun di kivaa no haid miampai au tagal mongukab toi ko monoodo lahan kavavagu i kikatangaban kopogompit uvang pias id pogun diti.

Vozoon Montili Datuk Seri Mohd Shafie Apdal minoboos kouhanan lebuh raya di efisien pointantu no do kiguno montok kotundaan sosioekonomi mogiigizon Sabah, nga, kapanadaan infrastruktur dino nogi mositi maganu pongintangan mintamong pias pinoopi montok ekosistem mamaasi suvai.

“Ino (kapanadaan Lebuhraya Pan Borneo Sabah au kopogompit pias pinoopi) nopo nga sombogizan ahal pibaasan polinta pogun mantad po toi boogizan kogompit id nazatan Hongkod om humansan zou dioho maganu totuhid ahal dino.

“Kapanadaan lebuh raya dino apatut au popoompit panagadan kazu toi ko kapanaanan nuhu tu koinsamakan dino kopogompit nogi pias id Sabah suvai ko kapanaak tanda kumaa sandad posoihi,” ka disido kuminaa magaganu abal kahapas pinopoimagon pitimbungakan sompomogunan Heart of Borneo om Tadau Pias Sompomogunan 2019 id doiti, di koniab.

Minoboos i Mohd Shafie dino ontok pinokianu popointahang kogompit katangaban tabaa mamasi tosizau kumaa kapanadaan Lebuhraya Pan Borneo i tumahib uvang pias pinoopi tu okito kakasou mamasi tosizau.

Ontok Tadau Koduvo, Tabaa Mamasi Tosizau Benoit Goossens id suang iso luputan portal abal minanaak kopoingatan kokomoi tanda kumaa tuhun om tazam i nantakan nung projik kapanadaan Lebuhraya Pan Borneo dino pasagaon momutu uvang pias pinoopi id Sabah.

Minoboos isido sombogizan kapanadaan lebuhraya dino momutu rizab pias kelas 1 id nombo kikatangaban ontodonon mamasi tosizau miaga do gajah om beruang madu mundahiu kumaa uvang suvai i tuutulus kopoinsavat katangaban piahatan tuhun om tazam.

Pinopointahang poingonop, minoboos i Mohd Shafie, kapanadaan lebuhraya dino hobi osikap om kopingkikit balanja nung ino popoompit kalaja ngaavi papahaab talun-alun di kivaa no haid piagahon mongukab lahan kavavagu i maganu timpu montok kalaja pogonuan tanah.

Naamot dino, minoboos i Mohd Shafie, piokunan naanu id suang pibaasan piahatan polinta pogun miampai Montili Kousinan Lim Guan Eng om Montili Kalaja Pindahanan Kavavagu Bian montok au popogompit boogizan misosondi miaga do tambahut kapanadaan projik (PDP) id suang projik Lebuhraya Pan Borneo id Sabah montok mongintong ponoinaan kousinan om balanja kapanadaan hobi efisien miampai berakauntabiliti.

Minoboos isido projik lebuhraya dino mositi toinaon id lahan otuhid tu onu i hobi kiguno layat kaanu kovosian mantad kapanadaan dino.

Ontok po nogi dino, humansan nogi i Mohd Shafie haang popoompit agensi polinta pogun id suang kapanadaan lebuhraya dino aanu poposikap.

The Edge Financial Daily di koniab pinoposogu do Polinta Hongkod maganu kotontuan au monoimo tonggungan PDP om umohon kumaa model kuntilikto turnkey montok projik kapanadaan Lebuhraya Pan Borneo kihoogo RM29 bilion dino.

Borneo Highway PDP Sdn Bhd nopo nga PDP montok lebuhraya dino montok boogizan Sabah poompus 706 kilometer, montok Lebuhraya Borneo Utara Sdn Bhd nopo nga PDP montok boogizan Sarawak.

Bernama